Afangs Mai esch s'ganze OK met allne Ressortmitglieder em Bächlihof zämecho. S'Präsidium und d'Ressorts hend über de aktuell Stand vo de Vorbereitige informiert: Was lauft, was chunnt als Nächsts, und wo simmer scho wiiter als plant.
Nach em offizielle Teil semmer zum gsellige Teil übere gange. Bi Spies und Trank hend mer eus über diversi Themene ustuscht und eus för di wiiteri Zämearbet besser kenneglernt. Schliesslich stemmed mer das Fescht als Team us allne sächs Vereine.
Als Highlight vom Obe hämmer eus denne no dörfe eusem neue Hobby widme: em Wimpelbastle. Innert chürzester Ziit hämmer dank vellne fliissige Händ euses Tagesziel vo 1000 Wimpel för eusi Turnfest-Deko erreicht. Grandios! Am Fescht selber werded die Wimpel s'Festgländ und d'Dörfer schmücke.
